صديق مواطن بسيط من السواد الاعظم من المغاربة المضرورين من غلاء الأسعار، متزوج عندو جوج وليدات و كاري جوج بيوت و كوزينة ب 1200 درهم، ولبارح شد الكانزا ديالو فيها 1850 درهم، صديقي من المحظوظين لي كيشد راتب اعلى من السميك، جاتو المٌٍينضة كاملة هاذ المرة حيث ما غيب تا نهار، المهم مشى البارح تقدى اول قفة ديال رمضان، هاشنو جاب فيها :
بطاطة 5 كيلو 50 درهم.
بصلة 3 كيلو 51 درهم.
مطيشة 4 كيلو 40 درهم.
جلبانة 2 كيلو 20 درهم.
خيزو 2 كيلو 16درهم.
لكرعة 12 درهم.
ربيع 4 قبطات 4 دراهم.
لوبيا كيلو ونصف 15 درهم.
لخيار 2 كيلو 20 درهم.
لفت غا شماتة كيلو 8 دراهم.
فلفلة لخضرا 2 كيلو 30 درهم.
ذنجال 2 كيلو 20 درهم.
الكرعة كورجيط كيلو ونصف 15 درهم.
4 لبيسات ديال لخص 6 دراهم.
4 لقبطات كرافص 6 دراهم.
كيلو بسباس 10 دراهم.
ملي سالى جمع الحساب لقاها معدية 320 درهم غير الخضرة فقط، القفة لي تكفي الأسرة اسبوع او عشر ايام بالكثير لا بغى ياخذ شوية ديال الدجاج، لحم، حوت، ديسير، الزيت او الطحين أو بوطة او تميرات او عطرية .... لي كتعتبر من الأساسيات...غادي تعدى 500 درهم بسهولة...
القفة كتاخذ منو على الاقل 1500 درهم شهريا، الكرا 1200 درهم، فاتورة الما و الضو واحد 300 او 400 درهم...
بنادم كيخدم عشر سوايع فالنهار كيغيب على اولادو 12 ساعة على الاقل يوميا ست ايام فالاسبوع تمارة ديال بصح، والاساسيات بحال القفة و الكرا و الما و الضو غالبينو...
الله يصاوب و صافي...